Mar-raxx tal-mewġ’ hemm jien u binti

Ismagħha titħabat mal-mewġa
ismagħha titriegħed bejn l-irwiefen
ta’ qalbha

se nitlaq, le mintix, se nibqa’,
le mintix – iva le iva le iva le

ħelwa dil-logħba tal-għażla
gustuża għax ma tantx nafha –
jew jekk nafh’ insejtha –

ilgħabli d-damma għax mhux inlaħħaq
ma’ oħtok, ma’ ħuk, mal-gvernaturi:
mhux inlaħħaq ngħattilkom widnejkom
kollha f’daqqa biex fikom ma titwelidtx:
it-twerwir mill-bombi – l-attakki ta’ mal-lej’:
it-tkexkixa ta’ taħt il-liżari
“ma, fej’ mortli, fej’?”

Qisni nafha dit-tikriba ta’ binti tmut bil-bard:
taċ-ċekċika f’qiegħ id-dgħajsa – ilgħabli waħda
forsi jirnexxieli nirbaħ waħda mill-għexieren
tal-gwerriet – se nibki biex forsi lil qalbi
ma ngħerriqhiex. Le mintix –

‘kk tkompli żżid
it-taqtiriet fil-baħar u
tgħerreq lil bintek miegħek

lili m’għandhom x’jambuni – bla isem bla pajjiż
bla dar bla familja bla saqaf imma mal-baħar:
mal-baħar dejjem kuntenti, nikkonvinċik, binti
tibżax ħanini dak mhux ser jibilgħek – dak iħobbok,
ngħidlek

ħallih jiblagħni l-baħar, għax inti ma tridnix
u meta terġa’ tiftaħ qalbek, mis-sakra li sakkartha
oħroġ imxi max-xatt, ħoss ir-raxx ma’ wiċċek kiesaħ
dik se tkun id-demgħa tiegħi u ta’ binti – għax int
ħallejtu jiblagħni

Written by: Klara Vassallo

(This article was originally written on civilsocietymt.com)