Bejn sema w baħar

Ibgħatuni lura pajjżi ħalluni ħa
nintilef
fix-xefaq

u allura ħalluni negħreq bilmod
nitbandal u negħleb u nitbennen
fuq mewġ jinki bejn nifs u għarqa
fuq sider jinki bejn bikja u tgħanniqa

għax wisq barranija għad-dar
u wisq barranija għal hawn
u qatt biżżejjed għat-tnejn

***

ma titlaqx mid-dar jekk mhux
qed tiġri warajk bin-nar taħt
saqajha – titlaq biss meta d-dar
ma tħallikx toqgħod iżjed fiha:

qatt ma tinsa d-dar li kienet wisq iżjed
minn lingwa li kibret f’ħalqek qabel tibda’
titkellimha bid-demm jitkaxkar ma’ lsienek

qatt ma tinsa d-dar qabel ma tibda’ tfittex
oħra għal bintek – għall-mara t’għada –
ma tarmihiex fil-baħar la darba l-baħar
mhux aktar dar mid-dar – ma tbenninhiex
f’idejn ħaddieħor – għax int il-mamà tagħha

int żammejtha sa ma flaħtx iżjed u issa
se jkollok tħalliha – għax pajjiżek ma jridekx
u int ma tridnix lanqas u allura,

“ħudu lilha u lili ħalluni mmut”

qatt ma taħrab ladarba ma jkollok xejn
minn xiex taħrab – ladarba pajjiżek
ma lagħabx waħda pulizija w ħallelin
bil-pistola ma widnejk – bomba taħt
ħaddejk – disgħa kull fl’għaxija – disgħa

disgħa u erbgħin
bejn sema w baħar

Written by: Klara Vassallo

(This article was originally written on civilsocietymt.com)